20 વર્ષના યુવકે ખભે લીધી મોટી જવાબદારી, 23 અનાથ બાળકોનો ‘અબ્બાજી’ બન્યો

આપણે નાના હતા ત્યારે આપણા પપ્પા આપણા માટે કેટલું કરે છે તે સમજી નહતા શકતા. પિતા ભલે માતાની જેમ પોતાનો પ્રેમ વ્યક્ત ન કરતા હોય, પણ બાળકના ઘડતરમાં તે માતા જેટલો જ મોટો ફાળો આપે છે. આપણે ઘણીવાર આપણા પિતાની જોઈએ એટલી કદર નથી કરતા, એટલે જ આપણે ફાધર્સ ડે સેલિબ્રેટ કરવાની જરૂર પડી જાય છે. જો કે પિતા હોવું એ લોહીના સંબંધ કરતા અનેક ગણો વિશેષ સંબંધ છે. તમને જાણીને નવાઈ લાગશે પણ 20 વર્ષની વલી રહેમાની નામનો યુવક 23 અનાથ બાળકોનો પિતા બન્યો છે. જે બાળકોને ક્યારેય પિતાનો પ્રેમ નથી મળ્યો તેને હવે વલી પિતાની હૂંફ આપશે.

ઈન્ડિયાટાઈમ્સ સાથેની વાતચીતમાં તેણે કહ્યું, “હું સમાજમાં થતા અન્યાય સામે અવાજ ઊઠાવવા માંગું છું. મને લાગ્યું કે હું આખા દેશમાં જાણે એકલો છું. મને લાગ્યું કે જ્યારે મારી ઉંમરના છોકરાઓ પાર્ટી કરવામાં વ્યસ્ત છે ત્યારે મારે એવું કંઈક કરવું હતું જેનાથી સમાજને પ્રેરણા મળે.”તેણે વધુમાં જણાવ્યું, “મને થયું કે 10 બાળકોને લઈને તેમને એવા નેતા બનાવું જે માનવતા અને પ્રેમનો સંદેશ ફેલાવે. નેતાની મારી પરિભાષા થોડી જુદી છે. મારા મતે નેતા એટલે એ વ્યક્તિ જે બીજા નેતા ઘડી શકે. હું મૃત્યુ પામુ એ પહેલા હું આવા નેતા બનાવવા માંગું છું.”

12 મા ધોરણ પછી તેણે એક વર્ષ ગેપ લીધો અને કલકત્તાના દરેક સ્લમની મુલાકાત લીધી. 1 એપ્રિલ 2018ના રોજ તેણે ઉમીદ નામની સંસ્થા સ્થાપી. આ સંસ્થાનો આશય તેના નામમાં જ પ્રતિબિંબિત થાય છે. તેણે કહ્યું કે સ્લમના બાળકો આ દેશની ઉજળી આશા બનશે. રહેમાનીએ ઈન્ડિયાટાઈમ્સને જણાવ્યું કે, “તેણે પહેલા 3 બાળકો દત્તક લીધા અને 1 જ વર્ષના ગાળામાં તેના અનાથાશ્રમમાં બાળકોની સંખ્યા વધીને 23 થઈ ગઈ. 11 બાળક અનાથ છે અને 12 એવા બાળકો છે જેના માથે છત પણ નહતી. હવે ઉમીદે તેમને આશરો આપ્યો છે.”

તેણે વધુામં જણાવ્યું, “બાળકો અહીં આવ્યા ત્યારે કુપોષિત અને ઓછું વજન ધરાવતા હતા. 1 વર્ષા ગાળામાં તમે જોઈ શકો છો કે તે કેટલા સ્વસ્થ દેખાય છે. અમે તેમને શ્રેષ્ઠ ડાયેટિશિયન, ચ્યવનપ્રાશ જેવું શ્રેષ્ઠ ફૂડ અને શ્રેષ્ઠ ભણતર આપ્યું છે.” રહેમાનીનો ધ્યેય તે 20 વર્ષનો થાય તે પહેલા 10 બાળકને દત્તક લેવાનો હતો. 23 બાળક સાથે તેનો આ ધ્યેય પૂરો થઈ ગયો છે. આ બધા જ બાળકો તેને અબ્બાજી કહી બોલાવે છે. અહીં બાળકોના ભણતર પર ખાસ ભાર અપાય છે અને સવારે સાતથી સાંજે સાત સુધી તેમનું ટાઈમ ટેબલ ફિક્સ હોય છે.

રહેમાની કહે છે કે આ સેવા નથી, પણ આપણી સામાજિક ફરજ છે. તે કહે છે કે તેને લાગે છે કે 20 વર્ષની ઉંમરે તે 23 બાળકોનો પિતા બની ગયો છે. રહેમાની કહે છે, “મને એ વિચારીને ખૂબ જ ખુશી થાય છે કે 10 વર્ષ પછી આ બાળકો એન્જિનિયર, ડોક્ટર, IAS ઑફિસર બનશે. એ લોકો ઉમીદનું સુકાન તેમના હાથમાં લેશે, દેશની સેવા કરશે અને સમાજને પાછું આપશે. આ લાગણી કંઈક અલગ જ છે.”

આવતા રવિવારે ફાધર્સ ડે છે ત્યારે રહેમાની યુવાનોને સલાહ આપે છે, “આપણે આપણા માતા-પિતાને માન આપવાનું છોડી દીધું છે. તે આપણા પર ભાર હોય એવું આપણને લાગે છે. આપણે એ ભૂલી ગયા છે કે આપણા જીવનના કેટલા બધા વર્ષ આપણે તેમના પર ભારણ બન્યા છે. તે ખરેખર ખૂબ જ માન-સન્માનને લાયક છે.” તે યુવાનોને એમ પણ કહે છે, “સમય કિંમતી છે અને દરેક સેકન્ડ ગણાય છે. મને લાગે છે મારા માટે 24 કલાક પણ ઓછા છે. યુવાનોએ પાર્ટી કે હરવા ફરવામાં સમય વેડફવાને બદલે સમાજને વધુ સારો બનાવવાના પ્રયત્નો કરવા જોઈએ.”

ઘણીવાર સ્લમમાં પરિવાર તેમના બાળકોની પૂરતી સારસંભાળ નથી રાખી શકતા. એવામાં વલી રહેમાની જેવા લોકો તેમને સથવારો આપે છે અને તેમને જીવનમાં આગળ વધવાનો મોકો આવે છે.

LEAVE A REPLY

Please enter your comment!
Please enter your name here